ដោយ សេក បណ្ឌិត
2010-11-22
នៅរាត្រីថ្ងៃទី២២ ខែវិច្ឆិកា ឆ្នាំ២០១០ ត្រូវនឹងថ្ងៃទី៣ នៃពិធីបុណ្យអុំទូកចុងក្រោយ នៅតំបន់មជ្ឈមណ្ឌលកម្សាន្តកោះពេជ្រ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ មានឧបទ្ទវហេតុមនុស្សផ្អើលរត់ជាន់គ្នានៅលើស្ពានឆ្លងដៃទន្លេបាសាក់ ពីសួនច្បារ ហ៊ុន សែន ទៅតំបន់កោះពេជ្រ នៅម៉ោងប្រមាណជាង ៨យប់ បណ្ដាលឲ្យមនុស្សស្លាប់ និងរងរបួសរាប់រយនាក់។
២៣-វិច្ឆិកា-២០១០: សាកសពជនរងគ្រោះដោយឧបទ្ទវហេតុផ្អើលរត់ជាន់គ្នានៅលើស្ពានកោះពេជ្រ តម្កល់ទុកនៅមន្ទីរពេទ្យមិត្តភាពកម្ពុជា-សូវៀត ក្នុងរាជធានីភ្នំពេញ ដើម្បីរង់ចាំសាច់ញាតិមកទទួលយក។
នៅក្នុងព្រឹត្តិការណ៍គួរឲ្យរន្ធត់នេះ គេបានរកឃើញមនុស្សស្លាប់បានកើនឡើងជាបន្តបន្ទាប់។ មកដល់ម៉ោងប្រមាណ ៣ទៀបភ្លឺ ថ្ងៃអង្គារ ទី២៣ ខែវិច្ឆិកា គេបានរកឃើញមនុស្សស្លាប់ប្រមាណជាង ៣៣៩នាក់ និងរបួសធ្ងន់ សន្លប់ ប្រមាណ ៣២៩នាក់។ នេះជាការប្រកាសឲ្យដឹងពីលោកនាយករដ្ឋមន្រ្តី ហ៊ុន សែន តាមរយៈការផ្សាយផ្ទាល់តាមទូរទស្សន៍បាយ័នភ្លាមៗនៅរាត្រីកើតហេតុ ហើយគេរំពឹងថា ចំនួនមនុស្សស្លាប់នឹងអាចកើនឡើងទៀត។
លោកនាយករដ្ឋមន្ត្រីបានថ្លែងសុំទោស និងសោកស្ដាយចំពោះព្រឹត្តិការណ៍គួរឲ្យរន្ធត់នេះ និងចូលរួមរំលែកទុក្ខ ព្រមទាំងបញ្ជាឲ្យមានការស៊ើបអង្កេត និងធ្វើកោសល្យវិច័យលើសាកសពដែលបានស្លាប់ និងអ្នករបួសជាបន្ទាន់ ទៅលើហេតុផលមិនទាន់ច្បាស់លាស់ថា ផ្ដើមឡើងដោយដួលសន្លប់ ហើយផ្អើលរត់ជាន់គ្នាបណ្ដាលឲ្យស្លាប់មនុស្សអស់ជាច្រើនបែបនេះ។
សាក្សីម្នាក់ជាបុរស អាយុប្រមាណ ២០ឆ្នាំ ដែលទើបងើបពីដួលសន្លប់នៅក្នុងហេតុការណ៍ខាងលើនេះ បានថ្លែងទាំងឈឺចាប់ថា នៅពេលគេកំពុងដើរឆ្លងស្ពានថ្មី ឆ្លងពីកោះពេជ្រមកសួនច្បារ ហ៊ុន សែន នៅម៉ោងប្រមាណ ៨កន្លះ មានគេស្រែកឆោឡោតៗគ្នាថា ស្ពានជិតបាក់ហើយ ហើយក៏រត់បុកដួលជាន់គ្នាកាន់តែខ្លាំងឡើងៗ បណ្ដាលឲ្យមានអ្នកសន្លប់កាន់តែច្រើនទៅៗ អ្នកខ្លះរត់រួច អ្នកខ្លះបង្ខំចិត្តលោតចុះទឹកទាំងប្រថុយជីវិត។
សាកសព និងអ្នករបួសភាគច្រើន ត្រូវបានស្រង់ពីទឹក ហើយបានបាក់ដៃជើងដោយជាន់លើគ្នា។
ការពិនិត្យដោយភ្នែកនៅពេលយប់ក្រោយហេតុការណ៍បានធូរស្រាល នៅលើស្ពានកើតហេតុនោះ ទាំងសមត្ថកិច្ច និងអ្នកសង្កេតការណ៍ផ្សេងៗ ពុំទាន់អាចសន្និដ្ឋានបានថា ស្ពាននោះមានការប្រែប្រួលខុសសភាពដើមយ៉ាងណានោះទេ។
សាកសព និងអ្នករបួស ត្រូវគេដឹកតាមរថយន្តសង្គ្រោះបន្ទាន់ និងរថយន្តកងរាជអាវុធហត្ថជាច្រើនគ្រឿង ទៅកាន់មន្ទីរពេទ្យចំនួន៤ ក្នុងទីក្រុងភ្នំពេញ ក្នុងនោះមានមន្ទីរពេទ្យមិត្តភាពខ្មែរ-សូវៀត ឬហៅថា ពេទ្យរុស្ស៊ី ជាដើម។
ក្នុងពេលនេះដែរ រដ្ឋាភិបាលបានប្រកាសឲ្យប្រជាជនណាដែលបាត់បងប្អូន សូមអញ្ជើញទៅទាក់ទងមន្ត្រីសាលាក្រុងភ្នំពេញ ដើម្បីសួររកសាច់ញាតិ និងសាកសព។
លោកនាយករដ្ឋមន្ត្រី បានប្រកាសយកថ្ងៃទី២៥ ខែវិច្ឆិកា ជាថ្ងៃកាន់ទុក្ខទូទាំងប្រទេស ចំពោះអ្នកស្លាប់ក្នុងព្រឹត្តិការណ៍គួរឲ្យអាណោចអាធម្មទាំងនោះ៕
No comments:
Post a Comment